തൃശ്ശൂർ ;
നഗരത്തിൽ ഗതാഗത കുരുക്കും ആശങ്കയുമുണ്ടാക്കി ഗണേശനെന്ന ആനയുമായി പാപ്പാൻ്റെ സഞ്ചാരം.
തൃശ്ശൂർ നഗരത്തിലാണ് അമ്പരപ്പിക്കുന്ന സംഭവമുണ്ടായത്. ആനയുമായി സ്വരാജ് റൗണ്ടിലേക്ക് എത്തിയ പാപ്പാൻ ഒരു മണിക്കൂറിലേറെ സ്വരാജ് റൗണ്ടിൽ തമ്പടിച്ചു. ഇതോടെ സ്ഥലത്ത് ഗതാഗതക്കുരുക്കായി. ഒടുവിൽ പൊലീസെത്തി, ആനയെ സുരക്ഷിതസ്ഥാനത്തേക്ക് മാറ്റണമെന്ന് പൊലീസ് നിർദ്ദേശിച്ചിട്ടും ആനയെ നിയന്ത്രിക്കാൻ തയ്യാറാവാതെ പാപ്പാൻ ആനപ്പുറത്തിരിക്കുകയായിരുന്നു.
സ്വരാജ് റൗണ്ടിൽ നിന്ന് പൊലീസ് അകമ്പടിയിൽ പാപ്പാനെയും ആനയേയും കൊക്കാല ജംഗ്ഷനിലേക്ക് കൊണ്ടു വരികയും കൂർക്കഞ്ചേരിയിലെ ഉടമയുടെ വീട്ടിലേക്ക് ആനയെ എത്തിച്ച് തളക്കുകയുമായിരുന്നു.
കണക്കച്ചാൽ ഗണേശൻ എന്ന ആനയുമായി പാപ്പാൻ സിയാദാണ് നഗരത്തിൽ പരിഭ്രാന്തി സൃഷ്ടിച്ചതെന്നാണ് വിവരം. കൂർക്കഞ്ചേരി കടക്കാച്ചൽ വീട്ടിൽ നജീലിന്റെ ആനയാണ് ഗണേശൻ.
ഉടമ അപകടത്തിൽ പരിക്കേറ്റ് കോഴിക്കോട് ആശുപത്രിയിൽ ചികിത്സയിലാണ്. അതേ സമയം പാപ്പാൻ മദ്യ ലഹരിയിലാണെന്നാണ് സംശയം."
